കൊച്ചി: പൂത്തോട്ട സ്വാമി ശാശ്വതീകാനന്ദ കോളജിൽ നടന്ന സൗത്ത് സോൺ ഇന്റർ യൂണിവേഴ്സിറ്റി വനിതാ ഹാൻഡ്ബോൾ ചാമ്പ്യൻഷിപ്പിൽ ആതിഥേയരായ എംജി യൂണിവേഴ്സിറ്റി ചാമ്പ്യന്മാരായി. പെരിയാർ യൂണിവേഴ്സിറ്റി രണ്ടാം സ്ഥാനവും കാലിക്കട്ട് യൂണിവേഴ്സിറ്റി മൂന്നാം സ്ഥാനവും മദ്രാസ് യൂണിവേഴ്സിറ്റി നാലാം സ്ഥാനവും നേടി.
വിജയികൾക്കു റോളർ സ്കേറ്റിംഗ് ഇന്റർനാഷണൽ മെഡലിസ്റ്റ് എ.എ. അബ്ന മെഡലുകൾ വിതരണം ചെയ്തു. ടൂർണമെന്റിൽ എംജി താരങ്ങളായ എം.ജെ. അയിലിൻ മികച്ച പ്ലെയറായും അൽഫോൻസ ബിജു ടോപ് സ്കോററായും തെരഞ്ഞെടുക്കപ്പെട്ടു. പെരിയാർ യൂണിവേഴ്സിറ്റിയിലെ ഭുവനേശ്വരിയാണു മികച്ച ഗോൾകീപ്പർ. ജി. ജയ്ബാല മികച്ച ഡിഫൻഡർ.
സമാപനസമ്മേളനത്തിൽ എംജി യൂണിവേഴ്സിറ്റി സ്കൂൾ ഓഫ് ഫിസിക്കൽ എഡ്യുക്കേഷൻ ഡയറക്ടർ പ്രഫ. ഡോ. ബിനു ജോർജ് വർഗീസ് അധ്യക്ഷത വഹിച്ചു. അസോസിയേഷൻ ഓഫ് ഇന്ത്യൻ യൂണിവേഴ്സിറ്റീസ് ഒബ്സർവർ ഗുരുദീപ് സിംഗ് ഗിൽ, കോളജ് പ്രിൻസിപ്പൽ പ്രഫ. കെ.എസ്. ഉല്ലാസ്, മാനേജർ എ.ഡി. ഉണ്ണികൃഷ്ണൻ, സെക്രട്ടറി കെ.കെ. അരുൺ കാന്ത് തുടങ്ങിയവർ പ്രസംഗിച്ചു.
അഖിലേന്ത്യാ ഇന്റർ യൂണിവേഴ്സിറ്റി വനിതാ ഹാൻഡ്ബോൾ മത്സരങ്ങൾ കോളജിൽ ഇന്ന് ആരംഭിക്കും. രാജ്യത്തെ വിവിധ സോണുകളിൽനിന്നു തെരഞ്ഞെടുക്കപ്പെട്ട 16 ടീമുകൾ അഖിലേന്ത്യാ മത്സരങ്ങളിൽ പങ്കെടുക്കും. ഏപ്രിൽ ഒന്നിന് സമാപിക്കും.